କୋସଲି ବାଲ୍ମିକି ଇନ୍ଦ୍ରମଣି ସାହୁ ସୁରତା କମିଟି ଆର କୋସଲି ଡେରା ପାଟନାଗଡ ତରଫ ନୁ ବଲାଂଗିର ଜିଲ୍ଲା ଘସିଏନ ଠାନେ କୋସଲିି ବାଲ୍ମିକି ଇନ୍ଦ୍ରମଣି ସାହୁଂକର ଜୟନ୍ତି ଉଜୁକ ହେଇଜେଇଛେ । ଉଛବ କେ ମୁଖିଆ କୁନୁଆଁ ହିସାବେ ସାକେତ ସାହୁ ଜୋଗ ଦେଇ କହେଲେ, “ଆମର ପୁରଖାପାତି ଜେନ ପରଂପରା ଆମକେ ଦେଇକରି ଜେଇଛନ ସେତାକେ ବଁଚେଇକରି ରଖବାର ଟା ଆମର ଦାଇତ୍ୱ ଏ ।” ଦେସ ସ୍ୱାଧିନ ହେବାର ଆଘୋନୁ ଜେତେବେଲେ କିହେ କଲ୍ପନା ନି କରିଥାଇ କୋସଲି ଭାସା ର ସ୍ୱିକୃତି ଲାଗି ଦିନେ ଲଢେଇ ହେବା ବଲି ସେ ସମିଆଁ କେ ରାମାୟଣ ବାଗିର ମହାନ ଗ୍ରନ୍ଥ ଲେଖିକରି କୋସଲି ସାହିତ୍ୟ ର ନିହି ପାଟିଥିଲେ । ଇନ୍ଦ୍ରମଣି ସାହୁ ଖାଲି ଲେଖନି ଥି ଆନ୍ଦୋଲନ ନି କରି ସେ ନିଜର ସରକାରି ଚାକରି ଛାଡି ଦେସର ସ୍ୱାଧିନତା ସଂଗ୍ରାମ ଥି ଝାସ ଦେଇଥିଲେ । ଗାଁ ଗାଁ ବୁଲି ଅନିଏ ଅତ୍ୟାଚାର ବିରୋଧରେ ଗାଂଧି ପାଲା କରୁଥିଲେ ବଲି କୁନୁଆଁ ମାନେ କହିଥିଲେ । ସଭା କେ କୋସଲି ଡେରା ର ସଭାପତି ଲାଲଚନ ବଗର୍ତି ସଭାପତି ହେଇଥିଲା ବେଲକେ ସନ୍ତୋଷ କୁମାର ଦାଶ ମୁଖିଆ କହନକାର ହିସାବେ ମଚାନେ ବସିଥିଲେ । କବି ଭକ୍ତବନ୍ଧୁ ବିଶ୍ୱାଲ ମଚାନ ଚଲେଇଥିଲା ବେଲକେ କ୍ଷୀରୋଦ୍ର କୁମାର ସାହୁ ଧନ୍ୟବାଦ ଦେଇଥିଲେ । ସଭା ର ଦୁସରା ଅଧିବେସନ ଥି କବି ଶାନ୍ତନୁ ବୁଧିଆକର ସଂଜୋଜନାରେ କୋସଲି କବିତା ପାଠ ହେଇଥିଲା ।
କୋସଲି ବାଲ୍ମିକି ଇନ୍ଦ୍ରମଣି ସାହୁ ଜୟନ୍ତି
