ନିର୍ବାଚନ ଗୁଟେ ଗଣିତର ଖେଲ । ଜାହାର ନ ସଂଖ୍ୟା ସେ ବସବା ଚୌକି ଥି । ଓଡିଶାରେ କାହାର ନ ରହେବା ସେ ଜାଦୁ ସଂଖ୍ୟା ? କାଣା ନବିନ ପଟନାଏକ ତାକର anti incumbency କେ କାଟି ପାରବେ ? କାଣା କଂଗ୍ରେସ ତାର ହଜାଲା ଦିନ ଫିରେଇ ପାରବା ? କାଣା ବିଜେପି ଗେରୁଆ କରିପାରବା ଓଡିଶା ? ରାଜନିତିର ଗାଁଖୁଲି ଏନ୍ତା କେତନି କଥା ଉଠୁଛେ ପଡୁଛେ ।
୧୯ ବଛର ଶାସନ କଲା ଉତାରୁ ବିଜେଡି ର anti incumbency ଜେନ୍ତା କଲେ ରହୁଛେ । ହେଲେ ବିଜେଡି ବି ସେ ବିରୋଧି ଲହର କେ କାଟବାରକେ ଖାସ ଜୋଜନା ବନେଇଛେ ୨୦୧୯ ଲାଗି । ନବିନ ପଟନାଏକକର ଜିବନି ଲେଖିଥିବାର ରୁବେନ ବେନାର୍ଜି କହେସନ, “ନବିନ ଗୁଟେ ନିରଦଇ ରାଜନେତା । ସେ ବିଜୟ ମାହାପାତ୍ରର ଟିକଟ ଏନ୍ତା ସମିଆଁ ଥି କାଟଲେ କି ବିଜୟ ସ୍ୱାଧିନ ହିସାବେ ବି ଠିଆ ହେଇ ନି ପାରଲେ । (ବିଜୟ କେ ଥରେ ମୌକା ଦେବାର କଥା) ଠିକ ସେନ୍ତା ନବିନ ସାଂଗେ ଏକେସାରି ବେଲବୁଡିଆ ଗୁଟେ ଟେବୁଲେ ବସି ମଦ ପୁ’ଥିବା ବୈଜନ୍ତ ପଣ୍ଡା ଏଜ ପାଟି ବାହାରେ । ନବିନ ବାବୁ ବିଷେ ନେ ଆର କହେସନ, ନବିନକର ପଛାଡେ ଜେନ ଗୁଟେ ଛାପା ଲାଗିଛେ, ଉଡିଆ ନେଇଁ ଜାନି, ଉଡିଶାକେ ନେଇଁ ଜାନି, ରବର ଷ୍ଟାଂପ ଆନ, ପ୍ୟାରୀ ଜାହା କହେଲେ ତାହା କରୁଥିଲେ । ନବିନ, ଭୋଟ ରାଜନିତିରେ ତାକର ବାପା ବିଜୁ ବାବୁ ନୁ ବେଶୀ ସଫଲ ଆନ । ବିଜୁ ବାବୁ ନାଁ କମେଇଛନ ବଡ ନେତା ହିସାବେ ହେଲେ ନବିନ ଏତକି ଦିନ ଶାସନରେ ନାଇଁ ରହି ।”
ତ ବିଜେଡିର ଯୋଜନା କାଣା ଏ ? ୩୩% ମହିଲା ସିଟ କେ ଆପଣମାନେ ହଲକା ହିସାବେ ନାଇଁ ନଉନ । ଜରୁର ମାହେଜି ଭୋଟ ନେବାର ଥି ସାହେଜ କରବା । ତାର ବାହାରେ ଗାଁ ମାନକୁ ମୁନୁଷ ପିଲା ଠାନୁ ମାହେଜି ଟୁକେଲ ବେଶୀ ଘରର କଥା ବୁଝସନ ଆର ଜେତକି ମାହେଜି ମାନକର ଏସଏଚଜି ଅଛେ ସବେ ଲୋନ ମାନେ ପାଇ ସାରଲେ ନ । ପିଠା ଜୋଜନା ରେ କାଣା କରୁଥିଲେ ପ୍ରକୃତରେ ? ଗାଁର ମାହେଜିମାନକୁ ସଁକିଲବାର ମୁଲକଲା ବିଜେଡି । ଫେର ଚାଷୀ ଆର ଭିନେ ଭିନେ ଗୁଟକେ ନିସାନା ବନେଇକରି ପଏସା ଏକାଉନ୍ଟରେ ପକାବାର ମୁଲକଲେ । ମାହୋଲ ଗଲା ଡିସେମ୍ବର ରୁ ବନାଲା ନ ବିଜେଡି । ବାକି କିଏ ରହେଲା ? ବେକାରି ଜୁଆନ ପିଲା । ବିଜୁ ଯୁବ ବାହିନି ରେ କେତନି ବିଜେଡି ଚିନ୍ତାଧାରାର ଜୁଆନ ପିଲା ସାମିଲ ହେଇଛନ ।
ଏତକିବେଲ ବିଜେପି କାଣା କରିଛେ ଟିକେ ଦେଖୁଁ । ଓଡିଶାରେ କଂଗ୍ରେସକେ ପଛେ ପକେଇକରି ବିଜେପି ଜରୁର ୨ନମର ଦଲ ହିସାବେ ଉଭରିଛେ । ଆର ପ୍ରାୟ ସବୁ ଠାନେ ଟକ୍କର ବିଜେଡି-ବିଜେପି ଭିତରେ ହିଁ ହେବା ବାଗିର ଦିସୁଛେ । ପଂଚାୟତ ଭୋଟର ଗଣିତକେ ବିଧାନସଭା ଆର ଲୋକସଭାର ଗଣିତ ସାଂଗେ ଜୁଲାଲେ ଭୁଲ ହେଇଯିବା । ଭୋଟର ରୁଝାନ ଅଲଗ ଥିସି ଦୁହି ଥି । ଗଲା ୨୦୧୪ରେ ମୋଦୀ ହାୱା ବେଶି ଥିଲା ଇ ଥର ନୁ । ୨୦୧୪ରେ ଓଡିଶାର ୧୮% ଭୋଟ ପାଇଥିଲା ଆର ମାତ୍ର ଗୁଟେ ସିଟ ଜିତିକରି ଜାଇଥିଲା ଲୋକସଭା ଆର ବିଧାନସଭାକେ ୧୦ ଟା ବିଧାୟକ ଯାଇଥିଲେ । ମାନି ନଉନ ପଂଚାୟତ ଭୋଟ ବେଲର ୮% ଅଧିକା ଭୋଟ ବିଜେପି ପାଉଛେ, ତ କେତେ ସିଟ ଅଧିକା ହେବା, ୧୫ ରୁ ୨୦ । ଯେତକି ଖବର ଆସୁଛେ ବିଜେପି ବି ଜହ ଧ୍ୟାନ ଲୋକସଭା ଥି ଦଉଛେ, କାରଣ ଗଲା ଦିନମାନକୁ ଯେନ ନିର୍ବାଚନ ମାନେ ହେଇଛେ ସେଥି ବିଜେପି ଖରାପ କରିଛେ ଆର ରାଜସ୍ଥାନ, ମଧ୍ୟ ପ୍ରଦେଶ, ଛତିଶଗଡ ବାଗିର ରାଜ୍ୟ ତାର ହାତୁ ଯାଇଛେ । ସେନ ଇହାଦେ କଂଗ୍ରେସ, ତ ସେନୁ ଲୋକସଭା ଲାଗି ନିହାତି ସଭ୍ୟ କମବେ । ଦିଲ୍ଲିର ଚୌକି ଥି ମୋଦୀ ବସବାରଟା ସବୁ ନୁ ମୁଖିଆ କାମ ତାର ଉତାରୁ ଭୁବନେଶ୍ୱର । ଉଡିଶା ଲାଗି ଜେନ ୧୨୦+ ନାରା ବିଜେପି ଦେଇଥିଲା, ଏଜ କାଏଲ ସେଟା ଆର ସଭା ସମିତି ମାନକୁ ନି ଦିଶବାର । ହେଲେ ବିଜେପି ତାର କେଡର ମାନକୁ ସବୁବେଲେ କ୍ରିୟାଶୀଲ ରଖବାର ଥି ସଫଲ ହେଇଛେ । ଗାଁ କେ ପହଁଚିଛେ ବିଜେପି । ସେଥିର ଲାଗି ତ ବ୍ୟକ୍ତିଗତ ଅନୁମାନ କରୁଛେଁ, ଇ ଥର ବିଜେପି, ବିଜେଡି କେ କଡା ଟକ୍କର ଦେବା । ହେଲେ ସେ ଟକ୍କର ନୁ ସଫଲ ହିସାବେ କେତେଟା ସଂଖ୍ୟା ତାର ପଲଟ୍ୟା କରିପାରବା ଯେ ମେ ୨୩ ଦିନ ଜନାପଡବା । ବାକି ରହେଲା କେନ୍ଦ୍ରର ଯୋଜନା ଆର ରାଜ୍ୟର ଯୋଜନା ନୁ କେତେ ଲୋକ ପ୍ରଭାବିତ ହେଇକରି ଭୋଟ ଦେସନ । ଆପଣ ଜଦି ଗାଁ ମାନକର ପାନ-ଦୁକାନେ କି ବନ୍ଧଘାଟେ ବସଲେ ଜାଏକ ଭଲସେ ଜାନି ପାରବେ । କେନ୍ଦ୍ରର ଯୋଜନା ଆସଲେ ବି ଭୁବନେଶ୍ୱର ବାଟୁ ଆଏସି । ଦିଲ୍ଲୀ ନୁ ଗେରୁଆ ହେଇକରି ଆସିଥିଲେ ବି ଭୁବନେଶ୍ୱରୁ ଯାହା ଆଏଲେ ବି ଲୋକ କୁ ସାଗୁଆ ଦିଶଶି । ହଁ, ଗେସ ସିଲିଣ୍ଡର ଗୁଟେ ନ ଯୋଜନା ଜେନଟା ଲୋକର କାମେ ଆସିକରି ସିଧା ମୋଦି କି ବିଜେପି ର ନାଁ ପଡସି ।
କଂଗ୍ରେସ ମଧ୍ୟ ପ୍ରଦେଶ, ଛତିଶଗଡ, ଆର ରାଜସ୍ଥାନ ନ ଭଲ କରିଛେ । ରାହୁଲ ଗାଂଧି ପୁଖତ ନେତା ହିସାବେ ଉଭରିକରି ଆସିଛନ । ଭୋଟ ଜିତଲା ଉତାରୁ ବେଲବୁଡେ ସାଂବାଦିକ ସମ୍ମିଲନି ଜିଏ ଶୁନିଛେ କହି ପାରବା, ରାହୁଲ ଗାଂଧିକେ ଫେସବୁକ ଆଦିରେ ଯେନ ପପ୍ପୁର ଛାପା ଲଗା ହେଇଛେ, ରାହୁଲ ପପ୍ପୁ ନେଇଁସେ । ହେଲେ ଓଡିଶା ବି ମଧ୍ୟ ପ୍ରଦେଶ କି ଛତିଶଗଡ କି ରାଜସ୍ଥାନ ନେଇଁସେ । ସେ ଜାଗାରେ ଆର କେନସି ଆଂଚଳିକ ଦଳ ନେଇଁନ । ସିଧା ଟକ୍ଟର କଂଗ୍ରେସ – ବିଜେପି ଭିତରେ । ଛତିଶଗଡରେ ଅଜିତ ଜୋଗୀର ଆଂଚଳିକ ଦଳ ସେତକି ପ୍ରଭାବିତ କରି ନି ପାରଲା । ଫାଏଦା କଂଗ୍ରେସ ନେଲା । ହେଲେ ଓଡିଶାର ଥିତି ଅଲଗା । ଓଡିଶାରେ ଆଂଚଳିକ ଦଳ ବିଜେଡି ଅଛେ ଆର ବିଜେଡି ଆସଲା ଦିନୁ ହିଁ ଓଡିଶାରେ କଂଗ୍ରେସ ଉଧେଇ ନି ପାରି । ବିଜେଡି ଯେତକି ବଢତେଲ ଯାଇଛେ, କଂଗ୍ରେସ ସେତକି ଛିଡତେଲ ଯାଇଛେ । କଂଗ୍ରେସ ବଢଲେ ବିଜେଡି ଛିଡବା ହେଲେ ସମିଆଁ ସମିଆଁ କେ ଭିନେ ଭିନେ କାରଣରୁ ଓଡିଶା କଂଗ୍ରେସ ଦଳ ଭିତରେ ଏନ୍ତା ଥିତିମାନେ ଉଭରିଛେ ଯେ ଏଜ ୧୩୩ ବର୍ଷର ଦଳ ୨ ଅଂକବାଲା ସଂଖ୍ୟା ଆନବା କିନି ଯେ ସନ୍ଦେହ ଭିତରେ । ଭୋଟ ଲାଗି ଲୋନ ଛାଡ ଆର Minimum Basic Income ବାଗିର ବ୍ରହ୍ମାସ୍ତ୍ର ଓଡିଶାରେ କାମ ଦେବା କିନି ଯେ ଦେଖବାର ଅଛେ ।
ସାକେତ ଶ୍ରୀଭୂଷଣ ସାହୁ
